Mĕ! Jơ̆ mĭnh nơ̆r krao hmă đĕch kŭm tôm mah pơm rơngơp kơ dôm tơdrong gleh lap đơ̆ng tơdrong arih. Rŏ lăng lăm đon tơchĕng rim ‘nu lu bơ̆n, rup mĕ đei ‘bôh đei hmă đĕch: jơ̆ juăt kơ ‘bâu ‘nhui ŭnh, jơ̆ nơ̆r krao khan hrĕp hreh ‘bơ̆t giơng tep, dah jơ̆ đơ̆ng măt hnhoi lăng kiơ̆ kon rim kơ dôm trong năm. ‘Blŏk kơ Năr Mĕ sơnăm ‘nâu, lu bơ̆n athei hơdai băl tơ’blŏk dơ̆ng dôm tơdrong ‘blŏk hơdơ̆r hiôk ‘lơ̆ng păng dôm kơ ‘bai pơhrăm đon lui thĕng hreh mă mĕ đei rei pơtăm lăm bơhngol lu bơ̆n. Athei ‘măn năr gĭt kăl ‘nâu wă tơ’bôh jơhngơ̆m băt bơnê đĭ jơhngơ̆m kơ bơngai drŏ kăn ‘lơ̆ng rŏ hloh lăm chăl arih bơ̆n.

Năr ‘nâu, ‘năr 10/05/2026, tơdrong tơdă Amăn Jơ Krao Khan Rim Năr apinh wơ̆n đĭ đăng bơngai mơ̆ng wang tơchĕng pơwao hơdai Nơ̆r Kră Yang hăm bơngai chih Gene Markland kơ̆l ‘bai MĔ

“Yêsu ‘bôh mĕ Sư păng bơngai pơhrăm păng Sư mă Sư ‘mêm. Sư khan kơ mĕ Sư thoi âu: “Ơ duch, ‘noh kon ih.” Păng khan kơ bơngai pơhrăm păng Sư: “’Noh mĕ ih.” Đơ̆ng năr noh bơngai pơhrăm ei anhăk ba mĕ Yêsu oei tơ hnam sư.” (Yôhan 19:26-27)

“Mĕ.” Lăp mĭnh nơ̆r krao noh đĕch kŭm tôm mah wă rŏu tơiung đak kơtah đơ̆ng đon tơchĕng păng ‘blŏk hơdơ̆r. ‘Noh jơ̆ tơdrong ‘blŏk đơ̆ng oei hơ’lơ̆p gah tơpang ti pơ’lơ̆ng pơ̆n che jĭ rơka tơ kŭl tăng rơka, păng hlĭch chrơp chŭm ‘bơ̆t che pơ̆n kơdih pơm kơ dôm tơdrong jĭ nhen thoi hiong đĭ. ‘Noh jơ̆ tơdrong jreo hiĕk păng hrơ̆ch tap ti lăm jơ hơri soang hnam trưng sơnăm inh hŏk lăm ‘bar, tap ti kơ rup tơwir akâu jăn inh lăm tơdrong pơm jing tơnơm ‘long- mĭnh tơnơm ‘long ưh kơ đei mĭnh nơ̆r pơma. ‘Noh kŭm jơ̆ dôm kơ hơ’mon păng dôm kơ nơ̆r krao khan ‘bơ̆t giơng tep, anih inh pơhrăm iŏk ‘bai pơhrăm đon lui blŭng a lăm tơdrong arih, sơng iŏk khan: “Kră Yang Tơ’ngla wei-lăng inh, inh ưh kơ khăi kơ kiơ.”

Đei kơplah, inh lăng dơ̆ng Sơ̆p Hla Bơar Nơ̆r ‘Bok Kei-Dei so sĕnh đơ̆ng mĕ- tơmam gĭt mĕ ling lang chĕp ba lăm dôm kơplah hơmet jĭ kơmăt lăm dôm kơ khei ‘năr hơtuch lăm chăl arih. Tŏk bŏk măng mu đơ̆ng tơdrong jĭ jăn, mĕ oei jơ̆ mĭnh tu tơdrong pŭn hiôk, oei kơjăp ră roi đon lui păng pơm kơdranh gah Kră Yang kơ dôm lu bơngai jĭ nai. Mă khan dang ei mĕ đei pơdơh lăm tơpang ti ‘Bok Dŏng Pơklaih, mă lei tơdrong arih păng tơdrong ‘mêm đơ̆ng mĕ oei ling lang chih răk lăm jơhngơ̆m inh.

“Mĕ.” Inh rai đei ‘bôh kơdih gơh sơng iŏk tơdrong pŭn hiôk rai hloh kơplah kon inh kŭm đei mĭnh ‘nu bơngai mĕ ‘lơ̆ng hloh- minh ‘nu bơngai mĕ ling lang đĭ jơhngơ̆m yua kơ kon hơ’lơ̆p. Akăn inh jơ̆ minh ‘nu bơngai mĕ ling lang ‘mêm mơnat, bơtho tơ’bôh, hơmet ming, ră roi, krao khan, chơt hiôk păng pơyơ̆r đĭ đon tơchĕng ăn kơ kon ling lang gơh liĕm akâu, chơt hiôk păng hiôk hian. Sư jơ̆ mĭnh ‘nu bơngai mĕ oei ling lang kơtoh đak măt rim sơnăm lăm năr năm dơ̆ng tơ hnam trưng, kơplah lăng ‘bôh kon drŏkăn yak tŏk tơ gre buit năm tơ lăm hŏk. Thoi noh na, wă pơhơi lê̆ tơdrong ơh sơ’ngon oei ‘blŏk păng tơgŭm akăn hơi ‘biơ̆, inh đei ba sư năm sa pơge. Tơpă, anat dêh wă hơnơ̆ng kơ nhơ̆m hmoi ‘bơ̆t anăp jơ̆ mĭnh pơnhan chhĕr tơmam sa ‘bâu phu. Sư jơ̆ mĭnh rup tơ’bôh ‘lơ̆ng ăn kơ kon drŏkăn lu nhôn pơhrăm iŏk păng pơm kiơ̆ rim năr.

“Mĕ.” Đei lơ bơngai mĕ ‘lơ̆ng tơpă oei hơdai lăm tơdrong arih rim ‘nu lu bơ̆n. Mă khan rim sơnăm lu bơ̆n đei ‘măn ăn mĭnh năr wă pôk pơ-ư dôm kơ bơngai mĕ, mă lei nhen thoi noh oei jơ̆ tim mă tôm mah pơting hăm dôm tơdrong mĕ lu bơ̆n trŏ tơpă gơh sơng iŏk.

“Mĕ.” Lăm tơdrong tơdă dŏng pơklaih tih hloh, đei mĭnh ‘nu bơngai mĕ gĭt kăl tơpă. ‘Noh kŭm jơ̆ bơngai drŏkăn đei pŭn tih ‘bơ̆t anăp ‘Bok Kei-Dei, đei kơdih ‘Bok Kei-Dei ‘Bă rơih iŏk wă dŏng tơgŭm păng tơpŭ Kon Pôm Sư. Yă đei ‘Bok Kei-Dei rơih iŏk dĭng truh mă lăp jơ̆ minh ‘nu bơngai hơdruh oei ‘lơ̆p, ưh tim mă hlôi mơn đei păng dơnuh pơmat, yă oei đei rơih iŏk wă dŏng tơgŭm ‘Bok Dŏng Pơklaih Yang Yêsu lu bơ̆n. Nhen thoi dôm kơ tơdrong pơlong lăng kơnê̆ ling lang tăp dăr trong yak năm yă, mă lei tŏk bŏk rơbâu tơdrong truh ưh kơ gơh hlôh băt- đơ̆ng drong jâu jô̆ ưh kơ trŏ, tơdrong bâu roi sa đơ̆ng teh đak dĭng truh kơ tơdrong druh đơ̆ng ‘bok pơtao pơm kơnê̆- yă oei thĕng hreh chu yom, pơyơ̆r đĭ chăl arih sư wă wei rong Kon Hơ’lơ̆p. Na trŏ kơ Tơ’ngla noh, kiơ̆ trŏ kơ jơ đơ̆ng ‘Bok Kei-Dei, đei tơ’bôh tơdrong ư-ang jơ̆ Pơtao kơ lu pơtao păng Yang kơ lu yang.

Tơdrong ‘nâu tơ’blŏk dơ̆ng kơ lu bơ̆n tơdrong tơchĕng pơwao jrŭ să: lei hăm đei dôm yơ lăm tơdrong kơjăp, jơhngơ̆m mơnat ăn păng tơdrong kĕ chơ̆n đơ̆ng ‘Bok Dŏng Pơklaih Yang Yêsu đơ̆ng đei wei rong yua kơ đơ̆ng tơpang ti bơwei đơ̆ng bơngai mĕ gah sĕch akar ‘nâu? Mă khan tôm tơdrong jơhngơ̆m ‘lơ̆ng rơgoh Sư đei đơ̆ng ‘Bok Kei-Dei ‘Bă, mă lei lu bơ̆n kŭm gơh ‘bôh tơdrong pơgơ̆r hlĭch chrơp đơ̆ng Kră Yang đơ̆ng tơdrong jang wei rong đơ̆ng yă Mari. Thoi noh na, lu bơ̆n ‘nĕ kơ hiơt pơ-ư kơ bơngai mĕ Sư lăm teh đak, yua kơ yă đei ‘Bok Kei-Dei ‘Bă yua iŏk thoi mĭnh tơmam mơnat ăn đĕch wă rĕi pơtăm păng wei rong lơ jơhngơ̆m ‘lơ̆ng rŏ noh lăm ‘Bok Krist.

“Mĕ.” Yă kŭm trŏ jơ̆ bơngai đei pơ̆n nuih tơ iung pơdah Yang Yêsu mơ̆t lăm tơdrong jang, kơplah yă pơlung Sư pơm tơdrong mơsêh blŭng a.

Lăm Yôhan 2:1-11, lăng ‘bôh nhen thoi Yang Yêsu ưh tim mă wă pơm đak jing sik, yua kơ Sư pơma khan jơ Sư tim mă truh. Mă lei, “Tơdrong mơsêh mơyang âu boih Yêsu pơm tơ’bôh kơ đe mă hơdrol. Sư pơm tơ Pơlei Kanna, dêh Galilê. Thoi noh boih na lu bơngai pơhrăm păng Sư lui kơ Sư đơ̆ng ‘Bok Kei-Dei tơpă.” (Yôhan 2:11). Mă khan jơ̆ Kon ‘Bok Kei-Dei ư-ang, Sư kŭm hlôi mơn đei tơdrong juăt hlĭch chrơp đơ̆ng tơdrong mĕ kon: minh ‘nu bơngai mĕ ling lang lăng kơnhăm kơ tơdrong ‘lơ̆ng hloh kơ kon sư!

Păng Sư đei hlôh băt kơ jơhngơ̆m bơngai mĕ, ‘blŏk răk tơdrong jang păng dŏng tơgŭm kơ yă mă khan kơplah Sư oei pŭ iŏk tơdrong jĭ jăn tơ ‘long pơglang.
“Yêsu ‘bôh mĕ Sư păng bơngai pơhrăm păng Sư mă Sư ‘mêm. Sư khan kơ mĕ Sư thoi âu: “Ơ duch, ‘noh kon ih.” Păng khan kơ bơngai pơhrăm păng Sư: “’Noh mĕ ih.” Đơ̆ng năr noh bơngai pơhrăm ei anhăk ba mĕ Yêsu oei tơ hnam sư.” (Yôhan 19:26-27)

Tơdrong ‘mêm mơnat păng tơdrong pơgơ̆p tôm mah đơ̆ng Yang Yêsu păng mĕ Sư ưh kơ sĭ lăp pơdơh ‘bơ̆t kông Gôlgôtha. Kơplah yă Mari krao khan hơdai hăm lu bơngai pơhrăm nai tơ anih kơjung lăm Năr Giĕng Pangtơkôt, Sư đei ăn Yang Bơhngol ‘Lơ̆ng kơ yă, păng tơdrong pơgơ̆p gĭt hloh noh oei pơtrơp dĭng truh dang ei. Yă jơ̆ mĭnh rup tơ’bôh tih tin kơ dôm lu bơngai pơm mĕ, kŭm thoi Sư jơ̆ kơmĭl tôm mah kơ dôm lu bơngai pơm kon.

Mĕ. Athei ‘mêm mơnat kơ mĕ hăm đĭ jơhngơ̆m. Athei gĭt kơ mĕ lăm rim kơ dui jơhngơ̆m. Păng athei lui yom kơ mĕ thoi mĭnh tơmam apah gĭt mă Kră Yang đei ‘măn ăn kơ chăl arih ih. Yua kơ mĕ trŏ tơpă hăm tôm tơdrong ‘lơ̆ng rŏ hloh!

Apĭnh đĭ đăng krao khan hơdai: Kơkuh kơ ‘Bă Kơpal Plĕnh, kon bơnê kơ Ih yua kơ tơmam ăn gĭt kăl jơ̆ bơngai mĕ mă ‘mêm mă Ih đei ‘măn ăn kơ chăl arih kon. Bơnê kơ Kră Yang yua kơ đơ̆ng jơhngơ̆m kĕ chơ̆n păng tơpang ti pơnam đơ̆ng mĕ, kon đei bơih pel truh tơdrong ‘mêm tih să păng gĭt kăl đơ̆ng Ih. Krao apinh Kră Yang tuh ăn tơdrong pŭn hiôk rơkah rơkai kơ dôm lu bơngai mĕ dang ei. Apinh Ih tơgŭm ‘măn ăn kơ mĕ jơhngơ̆m pran ‘nao rim năr, bơhngol ling lang ‘nao plơ̆ng păng hiôk hian lăm dôm kơ hiơ̆k bơngơ̆t kơ tơdrong arih. Apinh tơgŭm kon ling lang băt gĭt păng arih ‘mêm yom hăm mĕ, wă kơ anăn Ih đei pơchrang hơdah đơ̆ng trŏ tơdrong mĭnh jơhngơ̆m păng ‘mêm mơnat lăm hnam dơnŏ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, Năr Mĕ gô hlôi kiơ̆ kơ jơ năr dăr, mă lei tơdrong ‘mêm mơnat păng dôm kơ adrĕch đon lui mă mĕ đei rĕi pơtăm gô đei ling lang hơdrih dreng lăm anih teh bơhngol lu bơ̆n. Hơpơi khan jơhngơ̆m ‘mêm yom ‘măn ăn kơ mĕ ưh kơ sĭ hơgăt lăm mĭnh năr phĕt ‘blŏk hơdơ̆r, mă lei gô jing tơdrong juăt arih tơnŏ lăm hnam dơnŏ ih. Hơpơi kơ Kră Yang tuh ăn pŭn hiôk rơkah rơkai lăm dôm kơ bơngai mĕ, ăn kơ lu sư ling lang chă ‘bôh jơhngơ̆m pran ‘nao păng tơdrong chơt hiôk lăm tơdrong jang gĭt mă Sư đei ‘măn ăn. Hơkat pŭn hiôk kơ đĭ đăng păng hnam dơnŏ đei mĭnh Năr Mĕ tôm mah păng ‘bĕnh blai tơdrong ‘mêm mơnat lăm ‘Bă Kơpal Plĕnh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.