‘Bơ̆t tuch luch buăl tơ’bôh jơhngơ̆m huay kơ jô̆ tơtăm dêh noh kơplah ayơ? Lu bơ̆n pơhrăm iŏk thoi bơngai ‘lŏ, pơhrăm bơwei kơdih akâu tơ’bôh gah ‘nguaih pă hiơ̆k bơngơ̆t, mălei tơm kơ đơ̆ng tơdrong “wơ̆ ‘lŏ” noh pơm kơ bơhngol lu bơ̆n jing arăng na ataih đơ̆ng tơdrong ‘mêm tơpă. Kơplah lu bơ̆n hơdai tơ’bôh jơhngơ̆m băt ‘mêm kơ mĕ lăm dôm năr ‘nâu, kư̆m athei ‘măn jơ phŭt tơchĕng ming kơ kơplah oei ‘lơ̆p lăm jơhngơ̆m kơdih.

Năr ‘nâu, ‘năr 11/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Beth Patch kơ̆l ‘bai CHĂ MING DƠ̆NG JƠHNGƠ̆M THOI KƠ BƠNGAI ‘LƠ̆P

“Na Yêsu khan: “Iĕm lăng bơngai ‘lơ̆p âu sư ưh kơ đei layơ pơma pơang akâu kơdih. Inh khan kơ iĕm tơpă, dah iĕm khan wă kơ ‘Bok Kei-Dei pơgơ̆r iĕm, lei iĕm athei tơplih ming jơhngơ̆m đon iĕm kiơ̆ thoi bơngai ‘lơ̆p âu. ” (Mathiơ 18:3)

Inh oei ‘blŏk rơđah muh măt kơplah kon drŏnglo inh hiĕk na kơ dâu năm tơ inh, ‘nă hal ăn kơ inh minh pôm plei hơngo. Noh jơ̆ tơmam sư pơm tơ hnam trưng: minh pôm plei hơngo pik ‘bĕnh kơ bơlah bum ngô hăm ‘bơ wă ăn kơ sem sa. Sư chĕp ba tơlei pơgong, na pơma rah khan: “mĕ chô̆ atol plei hơngo ‘bơ̆t ‘măng ‘mŏk hơ, na mĕ hăm kon lăng sem păr năm sa.”

“Ôi, hơ iă dêh kon ơi!” – inh đei pơma khan, na inh kuăr kon păng bơnê kơ sư. Na dôm lu kon meo tơ cham to rŏ lăng kư̆m kŭp kơ̆l drơ̆ng thoi noh mơ̆n!

Hơ’lơ̆p ling lang rơhing pơm tơdrong kiơ noh phara ‘biơ̆ wă ăn kơ mĕ. Kon ưh pă kĕ gơ̆t bơih wă gô truh tơ năr phĕt ‘blŏk hơdơ̆r, kư̆ kơ tơ’bơ̆p mĕ na sư ăn tơmam “đêl pơcheh pơm” noh hloi! Tơdrong pơtrŭt đơ̆ng lăm jơhngơ̆m sư noh wă kơ mĕ ‘bă chơt hiôk, hăm jơhngơ̆m lui ngeh hmă đĕch noh gô sơng iŏk nơ̆r hiĕk hiôk, kuăr krôp păng đei nơ̆r bơnê. Kon tơ’bôh jơhngơ̆m sư tôm mah, huay kơ mong răk, huay kơ mơlâu, hăm jơhngơ̆m ‘nă hal, ‘bĕnh kơ tơdrong ‘mêm păng chang hơmĕng.

Rŏ lăng lăm trong yak năm jing minh ‘nu bơngai ‘lŏ, lu bơ̆n đei tơ hiong lê̆ tơdrong ‘lơ̆ng rơgoh mă đei đơ̆ng oei ‘lơ̆p noh. Lu bơ̆n hiơt bơih, kơ bơwei jơhngơ̆m ling lang rơhăo hơlăng tơdrong kăl dêh lăm tơdrong arih gah bơhngol pran kơtang, rơnŭk rơnoa. ‘Bai hơri “Yêsu ‘mêm kơ lu Hơ’lơ̆p” ưh kơ sĭ minh boa hiôk hơ iă ăn kơ lu ‘lơ̆p đĕch ôh. Lăm Mathiơ chăl 18, Yang Yêsu đei bơtho tơblang gah Plei ‘lơ̆ng: gah tơdrong arih tơ anăp, gah tơdrong arih đei khŏm khŏm păng tơdrong chang hơmĕng kơ lu bơ̆n. Kơplah oei pơma dơnuh hăm bơngai pơhrăm păng Sư, Sư krao bơngai ‘lơ̆p năm tơ Sư na pơma khan thoi âu: “Na Yêsu khan: “Iĕm lăng bơngai ‘lơ̆p âu sư ưh kơ đei layơ pơma pơang akâu kơdih. Inh khan kơ iĕm tơpă, dah iĕm khan wă kơ ‘Bok Kei-Dei pơgơ̆r iĕm, lei iĕm athei tơplih ming jơhngơ̆m đon iĕm kiơ̆ thoi bơngai ‘lơ̆p âu. Dah iĕm pơm kiơ̆ bơngai ‘lơ̆p âu ưh kơ pơang akâu, lei bơngai noh boih pơm tih lu bơngai mă ‘Bok Kei-Dei pơgơ̆r.” (Mathiơ 18:3-4)

Lăm kơplah noh sơ̆, lu bơngai pơhrăm păng sư đunh sơnăm yak năm hăm Sư. Lu sư lăng ‘bôh tơdrong mơsêh mơyang kơplah đei đơ̆ng pơđăm tŏ ‘bĕng mi hăm ‘bar hlak ka na ‘me ăn kơ pơđăm rơbâu bơngai sa. Lu sư oei hơdai tơnoh kơplah dôm lu tơdrong mơsêh hlĭch pơklaih tơdrong jĭ jăn, na lăm jơhngơ̆m đon lu sư đei wei rong hăm tomo gĭt gơh hơgei lăm tơdrong pơtih gia đơ̆ng Yang Yêsu.

Đơ̆ng dôm kơ hlôi yak năm hơdai păng tơdrong gơh hơgei, lu bơ̆n ‘bôh lu sư hlôh kơ trong chông ba yak năm tơ Dêh char ‘Bok Kei-Dei. Mălei Yang Yêsu đei tơ’bôh thoi âu: tơdrong hlôh wao kư̆m đei jing pơgăn lê̆ tơdah ưh kơ đei jơhngơ̆m băt kơ pơyom iŏk jơhngơ̆m đon ala. Lu sư, păng lu bơ̆n, kăl kơ đei “tơdrong tơ‘bôh ăn” ‘nao: noh jơ̆ pơhrăm iŏk tơjur jơhngơ̆m đon tơ ala, hmă đĕch păng pơjao thoi bơngai ‘lơ̆p oei hơdai lu sư.

Jơ ‘nâu, kơplah wơ̆ ‘lŏ bơih păng đei mơn kơ tơdrong arih lăm chăl arih, pơm liơ wă kơ lu bơ̆n chă ‘bôh măt lăng rơhăo hiôk thoi kơ bơngai hơ’lơ̆p noh sơ̆.

Inh đei tơchĕng pơwao kơ tơdrong hơ’mon kơ “plei hơngo” noh. Adrol kơ kon inh ăn kơ inh, ưh kơ sĭ mĕ kon nhi đei “ ‘nhĕm bot ‘nhot ‘lơ̆ng”. Kư̆m đei inh hil kơ kon yua kơ kơchu, kư̆m đei kon sơ’ngon yua kơ klai gar hăm oh sư, mălei ưh kơ đei jơhngơ̆m kơnê̆ ayơ klơ̆p gom lê̆ jơhngơ̆m hiôk chơt, kơplah sư ăn kơ inh tơmam lăm Năr ‘blŏk kơ Mĕ. Rŏ lăng sư hiơt đĭ tôm tơdrong ưh kơ ‘lơ̆ng, tŭk lê̆ jơhngơ̆m blĕk, jơhngơ̆m klai gar, dôm kơ sơ’ngon dah lăm jơhngơ̆m đei tơdrong lăm bơngai ‘lơ̆p ưh kơ đei hlôh tôm, wă ăn kơ inh jơhngơ̆m ‘mêm ‘lơ̆ng rơgoh tôm mah.

Lăm kơplah năr ‘blŏk hơdơ̆r kơ Năr Mĕ, lu bơ̆n athei pơhrăm iŏk wơ̆t dơ̆ng pơm bơngai ‘lơ̆p rơhăo hơlăng kơdâu năm tơ mĕ sư, kư̆m thoi hăm Tơ’ngla Pơjing. Yang Yêsu gĭt dêh kơ lu bơ̆n đơ̆ng năr tơpŭ lu bơ̆n. Athei kơdâu năm tơ Kră Yang, chro ti thoi kơ bơngai ‘lơ̆p, hiơt đĭ kơ chhŭr nuih, mơlâu, păng tŭk lê̆ jơhngơ̆m arăng. ‘Bă tơ kơpal plĕnh ti gô pôk glơng lu bơ̆n, Sư hiôk chơt sơng iŏk jơhngơ̆m chu yom păng mêm mơnat tơpă đơ̆ng kon Sư.

Apĭnh đĭ đăng krao khan hơdai: Kơkuh kơ ‘Bă mă ‘mêm, lăm năr ‘blŏk hơdơ̆r kơ năr mĕ, apinh Ih kư̆m năm tơ’bơ̆p kon lăm jơ ‘nâu. Apinh tơgŭm kon băt kơ chu yom mĕ hăm jơhngơ̆m băt kơ chu yom păng ư ang anăn Ih. Mă khan năr ‘nâu kon đei hơdai bơngai kon ‘mêm dah minh adrô̆ kon, apinh Kră Yang tơgŭm kon tŭk lê̆ tơdrong kơnê̆, dôm lu dur oei war găn lê̆ kon hăm Ih. Kră Yang ơi, Ih ăn kơ kon arih lăm teh đak ‘nâu đei rup thoi kơ lu hơ’lơ̆p. Jơ’nâu, apinh tơgŭm kon kư̆m băt jing thoi bơngai ‘lơ̆p đei pơgơ̆p hăm Ih. Kơkuh kơ Yang Yêsu, Ih trŏ kơ iŏk tơmam ‘lơ̆ng đơ̆ng tơdrong arih kon, dôm kơ tơmam pơyơ̆r đơ̆ng lăm jơhngơ̆m băt kơ pơih sơng iŏk. Kon kŭp kơ̆l krao khan yua anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, adrol kơ wă yak năm tơ tơdrong hrăt hrot tơ ‘nguaih to, athei ‘măn minh phŭt lăng ming “bơngai ‘lơ̆p” gah lăm kơdih akâu. Hăm đei tơdrong kuăr ayơ buăl tam mă đei kuăr? Hăm đei tơdrong huay kơ jô̆ yo ayơ buăl oei bơwei? ‘Nĕ ăn tơdrong arăng bơngai ‘lŏ găn lê̆ buăl sơng iŏk tơdrong pŭn hiôk đơ̆ng tơdrong iŏk jơhngơ̆m đon ala. Athei kơdâu năm tơ Kră Yang, păng kơdâu năm tơ mĕ hăm tơdrong đei pơma dơnuh thoi ki sơ̆ noh. Hơpơi kơ jơhngơ̆m lu bơ̆n đei pơtŏ ming lăm tơpang ti Kră Yang thoi kơ bơngai hơ’lơ̆p hiôk hian lăm tơpang ti mĕ. Na kơplah jơhngơ̆m lu bơ̆n thoi kơ hmă bơih, plei ‘lơ̆ng jing jê̆ lu bơ̆n rai hloh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.