13.05 Amăn Jơ Krao Khan Rim Năr: MINH ‘NU BƠNGAI LĂNG HMĂ ĐĔCH

Đei minh năr dơ̆ng truh, hăm dôm lu tơdrong proh hơmet plơ̆ng, tơdă tơdrong bơ̆jang, hiơ̆k bơngơ̆t…tŏk bŏk tơdrong arih đei rŏng anăp, lu bơ̆n ‘bôh kơdih minh adrô̆ tŏk bŏk rơbâu rơngan bơngai lăm teh đak ‘nâu. ‘Bơ̆t mum ayơ noh lăm kơ pal kơtuăl teh ‘nâu, lăm dêh char, lăm pơlei tih đei lơ bơngai dah tơ lăm anih iĕ hrĕp hreh… Lu bơ̆n, bơngai hmă đĕch thoi kơ bơngai nai! Mălei, đơ̆ng lăm tơdrong lăng hmă noh, ‘Bok Kei-Dei ling lang tơ’bôh tơdrong tơdă tih hloh đơ̆ng Sư.

Năr ‘nâu, ‘năr 13/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai MINH ‘NU BƠNGAI LĂNG HMĂ ĐĔCH

“Pŭn hiôk dêh kơ Jăl, akăn Hêber, bơngai Kênit. Noh mă bơngai drŏ-kăn đei tơdrong pŭn hiôk hloh lăm lu bơngai drŏ-kăn mă oei lăm bơsŭn!” (Lu ‘Bok Sek Tơlang 5:24)

Dôm kơ lu roi tơbăt đơ̆ng lăm điê̆n thoăi đơ̆ng Nguyễn Thùy ưh kơ sĭ tơ’bôh tơdrong mơlâu, mă đei tơdrong tơdui dih băl dôm kơ đei athei đơ̆ng anih jang klo inh păng kiơ̆ kơ tơdrong arih đơ̆ng ‘Bok Kei-Dei, minh tơdrong thoi kơ ‘nao đĕch hăm inh. Lăm ‘bar sơnăm lui gơnang kơ Kră Yang minh adrô̆ inh, mơlâu păng sơ’ngon kơplah adrô̆ lăm hnam akŭm tih, ưh kơ đei bu băt kơ inh, dôm kơ pơjuăt yak năm hăm đon lui ngĭl ngŭl ‘bơ̆t anăp athei tang măt ăn tŏk iŏk jên kơ anih jang klo inh. Tơdah ưh kơ tŏk iŏk jên dơ̆ng, wă khan nhen thoi achăng lê̆ tơdrong tơblah; na hăm inh, tơdrong noh thoi tơhiong lê̆ klo, minh tơdrong tơchĕng pơm kơ Nguyễn Thùy sơ’ngon păng chhŭr nuih kơplah lăng ming tơrŏng. Đơ̆ng adrol ki sơ̆, mă khan ưh kơ đei anăn lăm anih jang lăm hnam dơnŏ, inh adrin yak năm kiơ̆ kơ tơdrong jang klo inh, hơmet ming dôm kơ tơdrong hre đom tih, ngeh kơ inh đei tơgŭm klo, wă kơ wih brŏk. Mălei dôm kơ măng hrĕp hreh, sơ’ngon minh drô̆ lăm hnam rai hơnơ̆ng hloh.

Lăm tŏk bŏk măng, Nguyễn Thùy tơoei hrĕp hreh, lăng pơnhen tơ kơsô̆ điê̆n thoăi đơ̆ng klo sư ăn, wă pơma dơnuh tŏk iŏk jên, kơsô̆ kơ đeh đĕch, nhen thoi pŭ trăp kơ đĭ chăl arih. Inh pơdăr điê̆n thoăi lơwơ̆t, dui jơhngơ̆m tai … na kơtĭt chhŭt lê̆. Nhen thoi kơdih pơrăm lê̆ ŭnh om mă ‘bĕnh kơ đak măt, na hlĭch tơpă, kơplah đei tơdrong thoi noh, na lăm jơhngơ̆m inh ‘bĕnh kơ tơdrong hiôk hian ưh kơ hlôh thoi yơ, tơdrong hiôk hian ưh kơ đei đơ̆ng tơdrong arih, mă đei đơ̆ng Tơ’ngla inh lui gơnang. Inh tep măt: “Kră Yang ơi, kon chu yom nơ̆r Ih, ưh pă đei hre đom dơ̆ng bơih, ưh kơ yak năm dơ̆ng kiơ̆ kơdih akâu kon. Kon lui kơ Kră Yang gô bơtho tơ’bôh kơ kon pơjing hnam dơnŏ thoi Ih lăp đon.”

Nguyễn Thùy đei yak năm lăm tơdrong arih ‘nao, minh tơdrong drơ̆ng iŏk trŏ ‘blep, achăng lê̆ dôm kơ tơdrong pơrŏ pơang đơ̆ng kon bơngai lăm teh đak ‘nâu. Sư chu pŭ iŏk tơdrong klo sư achăng lê̆ sư, na yak năm lăm trong yak năm pơjing hnam dơnŏ kiơ̆ kơ Kră Yang, mă tơ anăp tam mă rơđah hơđăl.

Đunh sơnăm đei yak hơdai, krao khan păng chơchă kiơ̆ kơ Kră Yang hăm Nguyễn Thùy, jơhngơ̆m inh ‘bôh hlĭch dôm kơ tơdrong ‘Bok Kei-Dei đei bơ̆jang lăm chăl arih lơ bơngai mă Sơ̆p Hla Bơar Nơ̆r ‘Bok Kei-Dei đei chih. Lu bơngai đei đon lui, ‘Bok Kei-Dei đei pơjing lơ tơdrong phara băl, lăm noh đei lu bơngai lăng iĕ đĕch, dôm lu bơngai ngeh kơ hiơt bơih.

Sơ̆p hla bơar Lu ‘bok sek tơlang lăm chăl 4 đei ră roi gah tơdrong tơblah hlĭch chrơp lu adrĕch adrŭng Isơrael đơ̆ng ‘Bok Kei-Dei tơgŭm. Na Jăl, minh ‘nu bơngai drŏ kăn gah pơlei Kênit arih tơ anih tơmăn glă. Yă noh sư ưh kơ adrĕch adrŭng bơngai Isơrael, ưh kơ adrĕch đei rơih iŏk, ưh kơ đei tơdrong jang tih, mălei ‘Bok Kei-Dei yua kĕ jei ‘lơ̆ng rŏ ăn kơ kon pơlei Kră Yang.

Bơngai Kênit jơ̆ adrĕch adrŭng đei pơgơ̆p phara hăm kon pơlei Isơrael. Lu sư đei tơgŭm kon pơlei lĕch đơ̆ng dêh Êyiptơ (I Samuel 15:6), păng kư̆m đei tơ’blŏk lăm nơ̆r pơkă đơ̆ng ‘Bok Kei-Dei hăm Abram gah teh mă Kră Yang gô ăn (Blŭng a 15:18-19). Jăl kư̆m đei lăm tơdrong ‘mêm noh, jơ̆ minh ‘nu bơngai lăng hmă đĕch kiơ̆ kơ kon bơngai lăng lăm teh đak ‘nâu, mălei ưh kơ iĕ lăm tơdrong tơdă đơ̆ng ‘Bok Kei-Dei. Na dôm lu tơdrong pơm kơ Jăl ‘blŏk ưh kơ sĭ kơ đơ̆ng tơm, mă jơ̆ drơ̆ng iŏk păng pơm hloi, minh tơdrong drơ̆ng iŏk tơ’bôh kơ hlôh băt kơ ‘Bok Kei-Dei đơ̆ng bơngai Isơrael rơđah hloh păng huay kơ rơdu mơlâu.

Minh tơdrong rơđah Sơ̆p Hla Bơar Nơ̆r ‘Bok Kei-Dei đei tơ’bôh: “Jăl jơ̆ akăn Hêber… Pơtao Jabin păng Hêber jơ̆ đei pơgơ̆p ‘lơ̆ng.” (Lu ‘Bok Sek Tơlang 4:17). Yua kơ thoi noh, hnam dơnŏ Jăl đei pơgơ̆p ‘lơ̆ng hăm pơtao Jabin, bơngai mă ayăt kơ kon pơlei Isơrael. Tơdrong noh wă khan Jăl ưh pă dơ̆ng lăng đĕch bơih, bơwei kơdih akâu păng hnam dơnŏ, dah huay kơ hơdai tơblah. Mălei Jăl ưh kơ rơih iŏk tơdrong ‘lơ̆ng kơjăp. Yă âu rơih iŏk gah ‘Bok Kei-Dei, mă khan tơdrong gô pơm kơ tơdrong pơgơ̆p gô tơsŭl tơwŏk păng tơdrong bơwei kơdih mă sư đei.
Lăm bơyan tŏ lăm dêh char glă, Jăl lăng ‘Bok Kei-Dei ’bôh Sisêra, jơ̆ yŏng pơgơ̆r linh kơ pơtao Jabin sư jơ̆ pơrăm kon pơlei Isơrael hloh loi ‘bar jĭt sơnăm. Jăl hnhoi lăng yŏng pơgơ̆r linh Sisêra oei wă kơdâu tơpah bơsŭn yă âu, chă anih wă kơ’nơp.
“Yă Jăl lĕch sơng iŏk Sisêra na khan kơ sư: Ơ ‘bok yŏng mơ̆t bĕ tơ hnam inh ‘nĕ kơ hli. Thoi noh na sư mơ̆t lăm bơsŭn yă ei păng yă ei iŏk khăn tơsu kơ sư. Sư pơma hăm yă ei khan: Inh apinh ih song inh đak nhă tŏ sĕt, inh ‘maih nhă dêh. Yă ei iŏk get akar đak toh rơmo ăn kơ Sisêra nhă; đơ̆ng noh tơsu kơ sư khăn dơ̆ng.” (Lu ‘Bok Sek Tơlang 4:18-19)

Tơdrong juăt bơngai drŏ kăn đei lăm Jăl, jơ̆ hơlăng sơng iŏk păng tơnăp bơwei rong, ưh kơ đei tơhiong lê̆ tơdrong pran păng pơm hloi đơ̆ng Jăl, trŏ ‘blep dêh noh kơplah sư tĕnh ‘bôh đei đơ̆ng ‘Bok Kei-Dei. Jăl ưh kơ sĭ minh ‘nu bơngai linh, ưh kơ đei pơjuăt wă năm blah. Dôm kơ tơpang ti juăt kơ pơ̆ng jơngơ̆l wă chô̆ pơsŭn rim năr, dôm kơ tơdrong pơm iĕ, pơm rŏng năp, na ‘Bok Kei-Dei yua iŏk tơdrong noh pơ tôch lê̆ tơdrong arih Sisêra, pơm kơ Jabin, pơtao Canaan răm ‘bơ̆t anăp Isơrael. ‘Bok Kei-Dei rơih iŏk tơdrong kĕ jei lăm tơpang ti Jăl, păng tơdrong ư ang noh đei hơri ư ang lăm ‘bai hơri kơkuh đơ̆ng rŏng kơ kĕ jei:
“Pŭn hiôk dêh kơ Jăl, akăn Hêber, bơngai Kênit. Noh mă bơngai drŏ-kăn đei tơdrong pŭn hiôk hloh lăm lu bơngai drŏ-kăn mă oei lăm bơsŭn!” (Lu ‘Bok Sek Tơlang 5:24)

Kư̆m thoi kơ jăl, đei pơm hloi, pơ̆n nuih păng trŏ kơ jơ năr kiơ̆ kơ ‘Bok Kei-Dei lăm pơsŭn tơ char glă hrĕng kro ưh kơ đei bu băt, Nguyễn Thùy minh ‘nu bơngai oh ‘nao đĕch lăm Kră Yang, oei tam mă hlôh kơ tơdrong bơ̆jang lăm hnam akŭm, mălei lăm tơdrong hơdah Nơ̆r Kră Yang sư ‘bôh tơdrong hơlĕnh tơ lăm teh đak ‘nâu, sư rơih iŏk kiơ̆ nơ̆r ‘Bok Kei-Dei krao tơpă tơpăt păng ‘mêm mơnat.
Na đei minh năr ‘nei, oh noh krao inh hăm điê̆n thoăi, nơ̆r pơma ưh kơ đei rơđah, dui jơhngơ̆m gleh lap: “Mŏ ơi! Klo oh…sư hơmet tơmam wă weh tơ anih nai hăm oh. Sư wih brŏk tơ oh bơih mŏ ơi. Nhôn roi tơbăt tơdrong jang mŭk tơmam hiong răm bơih.”

Nơ̆r pơma mơ̆ng nhen thoi hiong răm đĭ, mălei jơ̆ pơtơm blŭng a kơ tơdrong kĕ jei hăm Yang Yêsu, hăm klo pơjing ming hnam dơnŏ. Trong yak năm tơ anăp pơtơm đơ̆ng blŭng a, mă lei pơm hloi hăm dôm tơdrong đei hlôi hloh păng pơtơm tơdrong arih ‘nao lăm tơdrong chông anhăk đơ̆ng Kră Yang đei ba ăn kơ Nguyễn Thùy tơdrong arih hiôk hian, minh tơdrong hiôk hian đơ̆ng tơdrong pơgơ̆p hiôk ‘lơ̆ng hăm ‘Bă mă ‘mêm.

“Mŏ ơi, Kră Yang ‘mêm kơ oh dêh!” – nơ̆r pơma noh jơ ‘nâu jing nơ̆r pơih blŭng a juăt kơ pơma dơnuh dih băl hăm lu nhôn.

Apĭnh đĭ đăng krao khan hơdai: Kơkuh kơ Kră Yang ‘mă ‘mêm! Bơnê kơ Kră Yang đei pơih măt lu nhôn ‘bôh mă khan oei iĕ, mă khan ngeh kơ hiơt bơih, mălei dah jơhngơ̆m oei ‘maih wă pơjao kơ Ih na Ih yua iŏk hloi tơdrong arih kon. Kră Yang ơi! Kon hơpơi pơyơ̆r tơdrong arih kon ăn kơ ‘Bă. Đơ̆ng dôm lu tơdrong iĕ rim năr, apinh tơgŭm kon tơpăt băt kơ mơ̆ng păng chu yom Ih chông anhăk. Apinh yua iŏk tơpang ti kon, mă khan rơdu tơrăn, mă khan hrĕng kro, mă arăng hơđang, wă kơ keh đang dôm tơdrong ‘lơ̆ng Ih lăp đon. Hơpơi kơ tơdrong arih kon jing tơmam đei yua lăm tơpang ti Ih, wă kơ tơ’bôh tơdrong hơdah Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đei lu anih, mă khan iĕ păng lăng hmă đĕch hăm lơ bơngai, mălei đơ̆ng dôm kơ anih noh, gô đei ‘Bok Kei-Dei dan lăm tơpang ti ih minh tơdrong rơih iŏk. Kră Yang kăl kơ tơpang ti, tơpang jơ̆ng dah ‘bơ̆r ih wă kơ dơ̆ng gah Sư, păng krao iŏk ih bơ̆jang pơ̆n nuih. Rŏ lăng ih rơih iŏk gah tơdrong ‘lơ̆ng kơjăp, hiôk rơhăo kơ kơdih păng chu yom kiơ̆ kơ ‘Bok Kei-Dei. Mălei, đơ̆ng tơdrong drơ̆ng iŏk chu yom nơ̆r Kră Yang gô chông ba ih đei tơdrong arih pŭn hiôk, ưh kơ đei la yơ ‘bônh, mă đei yua păng hiôk hian. Athei tơpăt kơ dôm lu tơdrong iĕ lăm rim năr, lăm hnam dơnŏ, lăm Hnam Akŭm, tơ lăm lu khŭl, tơ anih bơ̆jang, tơ anih hŏk pơhrăm tơ anih pơlei tih lu bơ̆n oei arih…yua kơ noh jơ̆ tơm kơ lu bơ̆n dan tơ lăm anih hăm hơmet jơhngơ̆m ăn kơ ‘Bok Kei-Dei bơ̆jang lăm rim ‘nu bơngai.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.