Đei mĭnh tơdrong tơpă pơm kơ lơ bơngai lui kơ Kră Yang đei mơn ‘bôh ‘nă hal, đei mơn ‘bôh hiơ̆k tơtăm. ‘Noh trŏ jơ̆ tơdrong Yang Yêsu gô jur dơ̆ng ưh kơ băt adrol. Lu bơ̆n ‘nă hal yua kơ băt kơdih gô gơh oei hăm Kră Yang khŏm khŏm. Mă lei tơpă ‘nâu kŭm pơm hiơ̆k tơtăm yua kơ lu bơ̆n ưh kơ băt layơ Sư jur dơ̆ng păng ưh kơ băt proh hơmet tơdrong arih kơdih thoi yơ ‘bơ̆t anăp mĭnh tơdrong tơpă gô truh na kơdih ưh kơ băt jơnăr. Tơdrong Sơ̆p Hla Bơar Nơ̆r ‘Bok Kei-Dei bơtho jơ̆ lu bơ̆n athei kơchăng kơ năr ‘noh.

Năr ‘nâu, ‘năr 14/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Martha Noebel kơ̆l ‘bai KƠCHĂNG KƠ NĂR KRĂ YANG JUR DƠ̆NG

“Na iĕm athei kơchăng ‘nĕ kơ thoi bơngai noh, hli kơ Inh Kon Bơngai wă jur tơ iĕm dơ̆ng kơplah iĕm ưh kơ lêng ê.” (Mathiơ 24:44)

Kơplah Yang Yêsu achăng teh đak ‘nâu wă tŏk tơ kơpal plĕnh, Sư đei ăn mĭnh nơ̆r pơkă tơpă, khan minh năr kơnh Sư gô jur dơ̆ng wă sơng iŏk kon pơlei Sư. Mă khan Sơ̆p Hla Bơar Nơ̆r ‘Bok Kei-Dei đei tơ’bôh dôm tơdrong đei ‘bôh adrol gah tơdrong Kră Yang jur dơ̆ng, mă lei lu bơ̆n oei ưh kơ gơh băt hơđăl jơ năr ayơ Sư gô jur.

Hăm dôm lu bơngai ling lang wă pơm yŏng kơ dôm tơdrong proh hơmet, lei tơdrong ưh kơ rơđah hơđăl ‘noh tơpă jơ̆ minh tơdrong pơlong lăng đon lui ‘bĕnh tơdrong pơmat. Athei pơlong tơchĕng lăng, ih gơh sơng iŏk nơ̆r roi tơbăt đơ̆ng mĭnh ‘nu bơngai tơmoi gĭt khan lu sư gô năm ngôi hơpong, mă lei ưh kơ đei băt kơplah ayơ lu sư gô dơdŭ ‘măng. Mơn lăm jơhngơ̆m đei chang gô, đei hiơ̆k bơngơ̆t ‘noh trŏ jơ̆ đơ̆ng lăm jơhngơ̆m lơ bơngai lăm lu bơ̆n kơplah tơ’bơ̆p hăm nơ̆r pơkă đơ̆ng Kră Yang.

Rŏ lăng dah đŏk chăl lăm Nơ̆r ‘Bok Kei-Dei ‘nâu lăm sơ̆p Mathiơ chăl 24, bơhngol ih mơn ‘bôh đei tŏ sĕt ưh kơ hơđơ̆ng dah ngĭl ngŭl. Dah ih kŭm lei lăi thoi inh, ling lang wă kơ tôm tơdrong đei lăm tơpang ti bơ̆n, lei tơdrong “blư hlĭch” lăm năr Kră Yang ‘bônh pơm kơ lu bơ̆n mơn ‘bôh hiong tơdrong pơgơ̆r. Mă lei tơdrong tơpăt tơpă ưh kơ trŏ layơ kŭm pơgơ̆r kiơ̆ thoi tơdrong wă kơdih đơ̆ng kon bơngai.

Dah lu bơ̆n gơh hơmet ming lê̆ tơdrong wă kơ băt tôm tơdrong hơđăl, lei inh lui khan trong Nơ̆r ‘Bok Kei-Dei ‘nâu gô ba ăn tơdrong rơngei păng phyơl hơiơch hlĭch tơpă kơplah lu bơ̆n chang gô ‘Bok Krist jur dơ̆ng. Hăm kơdih inh, ‘nâu kŭm jơ̆ mĭnh nơ̆r krao, kŭm jơ̆ tơdrong pơlung tih hloh lăm ‘bar tơdrong:

Mă mônh, tơdrong ‘nâu pơtrŭt lu bơ̆n tơplih anih: đơ̆ng dôm kơ tơdrong gô hiong răm đơ̆ng teh đak kơnhăm gah chăl đơ̆ng rŏng oei chang gô tơ anăp.
Dah lu bơ̆n arih chăl arih ‘nâu hăm tơdrong ‘bôh băt khan teh đak ưh kơ trŏ jơ̆ pơlei oei đei ling lang, khan plei ‘lơ̆ng bơih jơ̆ anih truh păng ‘Bok Dŏng Pơklaih Yang Yêsu gơh jur mă khan layơ, lu bơ̆n gô pơtơm arih mĭnh trong rơngei hloh, tơpang ti ưh pă rôp iŏk kơjăp dôm tơdrong pơ-ư gô hiong răm lăm chăl ‘nâu. Sơ̆p HLa Bơar Nơ̆r ‘Bok Kei-Dei tơ’blŏk khan teh đak ‘nâu gô hlôi hiong, pơlung tơiung lu bơ̆n athei pơjing tơdrong arih bơ̆n lăm hơnă đơ̆ng chăl đơ̆ng rŏng, hăm dôm tơdrong gĭt ưh kơ đei hiong răm, ưh kơ đei hach hiong. Lu bơ̆n gơh yua hnam ‘lơ̆ng rŏ hloh pơlei, mĭnh pôm gre kon ‘lơ̆ng, dah ưh kơ đei kiơ, mă lei tuch luch đĭ đăng dôm tơmam noh đei ưh kơ gĭt kăl tơpă. Tơpă thoi noh, lăp đei mĭnh Sư jơ̆ Tơ’ngla oei đei ling lang.

Mă ‘bar, tơdrong ‘noh pơtrŭt lu bơ̆n arih lăm anih kơchăng ră roi Tơdrong ‘Nao ‘Lơ̆ng.

Athei pơlong tơchĕng lăng, dah băt kơdih lăp trŏ pă mĭnh giĕng wă pơm kơdranh gah Kră Yang kơ dôm lu bơngai jum dăr, lei trong lu bơ̆n ră roi Tơdrong ‘Nao ‘Lơ̆ng hăm pha ra ưh? Dah gơh băt kơ năr Kră Yang jur đei jê̆ bơih, lei gô đei hloi lăm jơhngơ̆m lu bơ̆n gô pơyơ̆r mĭnh tơdrong pơtrŭt, kăl kơ pơm thoi yơ wă ba ăn tơdrong chang hơmĕng anih ‘Bok Krist truh kơ đĭ kon bơngai hloi. Lei lăi thoi kơplah ih oei chĕp lăm tơpang ti pơgang dŏng tơgŭm kơ tơdrong jĭ jăn ưh kơ gơh hơmet ‘noh, lei ih hăm wă gơh răk bơwei kơdih dah pơhiơ̆ ưh? Lăm jơhngơ̆m rim ‘nu lu bơ̆n oei đei chĕp “tơmam pơgang” kơ tơdrong yoch đơ̆ng teh đak. Thoi noh na, apinh Yang Bơhngol ‘Lơ̆ng wei rong wă kơ lu bơ̆n ling lang lăm tơdrong kơchăng, thoi nơ̆r bơtho lăm I Pêtrôs 3:15, đĭ jơhngơ̆m ră roi gah tơdrong chang hơmĕng tih hloh kơdih đei.

Apĭnh đĭ đăng krao khan hơdai: Kơkuh kơ Yang Yêsu, kon bơnê kơ Ih yua kơ tơdrong chang hơmĕng arih oei pơgơ̆r lăm kon. Bơnê kơ Ih yua kơ nơ̆r pơkă gah chăl đơ̆ng rŏng, khan Ih gô jur thoi mĭnh ‘nu ‘bok Pơtao kĕ jei wă sơng iŏk kon pơlei Ih. Kơkuh kơ Kră Yang, apinh tơgŭm kon arih lăm hơdah đơ̆ng chăl đơ̆ng rŏng, băt achăng pơhơi dôm kơ tơdrong ‘mêm hăm mŭk tơmam gô hiong răm. Hơpơi kơ kon ling lang ‘bơ̆t anih kơchăng, thoi mĭnh ‘nu bơngai kơdâu pơjei oei ‘bơ̆t anih blŭng a, wă klah asong tơdrong chang hơmĕng kơ Ih kơ đĭ đăng bơngai tăp dăr.

Kon kŭp kơ̆l krao khan yua anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, arih lăm anih kơchăng ưh kơ trŏ jơ̆ đei hiơ̆k tơtăm dah hli tơrơ. ‘Noh jơ̆ arih hăm tơdrong chang hơmĕng gĭt hloh gah minh anih ‘lơ̆ng rŏ oei chang gô. Dah ưh pă gơnang kơ dôm tơdrong gĭt lăm teh đak, tơpang ti lu bơ̆n gô jing pơdơh rơngei wă rôp iŏk tơpang ti Kră Yang, păng jơhngơ̆m lu bơ̆n gô tôm mah wă ră roi tơmam apah dŏng pơkliah kơ dôm lu bơngai jum dăr. Hơpơi wă kơ lăm năr ‘nâu, rim kơ yak ih yak năm, rim kơ nơ̆r ih pơma đei ‘bâu phu đơ̆ng chăl đơ̆ng rŏng. ‘Nĕ kơ ăn dôm tơdrong hiơ̆k bơngơ̆t rim năr pơm ưh kơ hơdah tơdrong ư-ang Kră Yang. Athei arih nhen thoi năr ‘nâu jơ̆ jơ năr tuch luch ăn kơ ih tơ’bôh tơdrong ‘mêm mơnat đơ̆ng ‘Bok Krist kơ teh đak ‘nâu.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.