15.05 Amăn Jơ Krao Khan Rim Năr: TƠ HNAM ‘BĂ ĐEI LƠ ANIH OEI

Lăm trong yak năm kiơ̆ Kră Yang, lu bơ̆n đei tơ’bơ̆p tơdrong truh tih lăm chăl arih bơ̆n. Tơdrong ataih dih băl dah sơ‘ngon thar truh, wă pơgom lê̆ tơdrong chang hơmĕng lăm lu bơ̆n. Mălei, tơdrong pơlong lăng lăm măng mu, nơ̆r Kră Yang jinh hơdah thoi minh pôm jrăng ŭnh. Tơ‘blŏk kơ lu bơ̆n, teh đak ‘nâu jing anih pơdơh. Tơdrong lôch ưh kơ layơ hiong tôch, yua kơ lu bơ̆n oei chĕp răk tơdrong pơkă pơkăm Kră Yang Yêsu: Sư năm adrol wă amet kơ lu bơ̆n minh anih ling lang tơ Hnam ‘Bă, anih đei tơdrong ưang păng rơnŭk rơnua ưh kơ hiong tôch.

Năr ‘nâu, ‘năr 15/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Diane Pearson kơ̆l ‘bai TƠ HNAM ‘BĂ ĐEI LƠ ANIH OEI

“Tơ hnam ‘Bă Inh đei lơ anih oei tơpă. Dah ưh kơ đei Inh kư̆m khan ưh kơ đei mơ̆n. Na dang ei Inh wă năm hơmet kơ iĕm anih.” (Yôhan 14:2)

Kristine minh ‘nu adruh 18 sơnăm oei liĕm kâu pran jăng hăm lơ tơdrong tơdă tơ anăp. Mălei hlĭch hlăch, sư đei tơ’bơ̆p tơdrong truh trăp dêh. Tơdrong jĭ trăp truh, lăm minh ‘bar năr ‘bĭch tơ hnam pơgang, ‘bok pơgang tơdra đei minh tơdrong jĭ ưh kơ gơh hơmet.

Dơ̆ng ‘bơ̆t tŏk bŏk tơdrong arih hăm tơdrong lôch, mĕ ‘bă Kristine sư sơ’ngon kơplah sư kơtơ̆ng nơ̆r khan chhŭr nuih: “Lu nhôn ưh kơ gơh pơm thoi yơ bơih, kư̆ bơwei mon hiôk lăm năr tuch luch”. Lăm tơdrong chhŭr nuih dêh noh, mĕ ‘bă sư đei lui gơnang kơ lu bơngai jang lăm hnam pơgang dŏng tơgŭm kon sư đei tơ’bơ̆p tơdrong sơ’ngon ‘nâu.

Donna, sư lăm khŭl hơmet bơngai jĭ trăp, ‘blŏk hơdơ̆r: “kơplah kơtơ̆ng tơdrong jĭ kơdih, hơbŏ lăng Kristine ơh ol păng sơ‘ngon, mălei hlĭch, kơplah dơning inh năm lăng sư, inh ‘bôh jơhngơm sư đei tơplih”.

Kơplah noh lăm tơpang ti Kristine ưh pă minh hlak hla bơar lăng tơdra tơdrong jĭ jăn sơ’ngon, noh minh pôm gơ’bang gôh đơ̆ng anih tĕch đak dơsơng, đei proh hơmet lơ gôh. Sư pơyar tơlang nhen thoi wăn ‘bai păng pơma hiĕk hăm Donna. “Ih athei iŏk minh gôh ayơ!”.

Mă khan ưh kơ băt tơdrong kiơ, Donna oei pơm kiơ̆ kơ sư păng iŏk gôh dreng plĕnh. Kơplah noh Kristine tơblang ăn hơdar mălei pơsĭt pơdrơ̆ng: “Mon wă jê̆ brŏk tơ Kră Yang adrol, yua kơ thoi noh mon wă hơmet kơ duch minh anih ‘lơ̆ng rŏ. Wă kơ ning mônh tơdah duch hăm mon tơ’bơ̆p băl tơ plei ‘lơ̆ng, duch gô ‘bôh anih duch ‘lơ̆ng rŏ kiơ̆ kơ thoi gôh duch wă.”

Lŏk đơ̆ng jơ phŭt noh, kơplah đei bơngai năm ngôi, Kristine thei lu sư rơih iŏk gôh ăn kơ anih lu sư tơ anih plei ‘lơ̆ng.

Mă khan hơdai hăm lu bơngai jĭ wă jê̆ lôch đunh sơnăm, Donna ‘bôh hlĭch kơ đon lui kơjăp thoi noh. Sư tam mă ‘bôh bơngai adruh 18 sơnăm na đei đon lui kơjăp thoi noh. Kristine hlôh băt rơđah teh đak ‘nâu jing minh pôm “hnam tơmoi” minh anih pơdơh wă năm tơ anih plei ‘lơ̆ng. Sư yua gơ’bang gôh nhen thoi tơmam pơm kơdranh arih kơ tơdrong arih ling lang. Tơgŭm lu bơngai oei arih chu iŏk tơdrong sư hiong hăm tơdrong hơđơ̆ng.

Đon lui Kristine nhen thoi reh brŏ jơwa, jơwa nơ̆r pơkă ‘lơ̆ng rŏ đơ̆ng Yang Yêsu lăm hla ar Yôhan chăl 14. Lăm jơ phŭt wă jê̆ weh ataih, Kră Yang pơlung lu jơ̆ng ‘bang Sư:

“Na dang ei iĕm athei chơ̆n jơhngơ̆m iĕm ‘nĕ kơ hli tơdrong kiơ. Iĕm adrin lui kơ ‘Bok Kei-Dei păng lui kơ Inh.Tơ hnam ‘Bă Inh đei lơ anih oei tơpă. Dah ưh kơ đei Inh kư̆m khan ưh kơ đei mơ̆n. Na dang ei Inh wă năm hơmet kơ iĕm anih. Đơ̆ng rŏng kơ Inh năm hơmet kơ iĕm anih oei, Inh gô jur tơ âu dơ̆ng, Inh wă anhăk ba iĕm tơ anih Inh; na iĕm oei hơdai hăm Inh ling-lang tơ ei”. (Yôhan 14: 1-3)

Mă khan Kristine brŏk tơ Kră Yang, nơ̆r pơm kơdranh sư ưh kơ tôch ‘bơ̆t doh. Lăm năr ‘bŭ sư, lu gơ’bang gôh dan pơ’lơ̆ng lăm bong sư. Tơdrong đon lui pơkă pơkăm sư đei roi kơ lu bơngai năm kiơ̆ ‘bŭ. Ưh kơ kăl kơ nơ̆r tơblang gơh hơgei, đơ̆ng tơdrong hơđơ̆ng sư wă pơsĭt pơkăm khan: Tơdrong lôch ưh kơ gơh pơm kiơ ăn kơ lu bơngai chĕp kơjăp tơdrong dŏng pơklaih Yang Yêsu.

“Kơplah bơ̆n sơng iŏk Kră Yang, lu bơ̆n bơwei kơjăp nơ̆r pơkă tơdrong arih ling lang” Donna khan. “Pŭn hiôk dêh kơplah Kristine păng hnam dơnŏ sư lăng tơdrong lôch sư hăm đon lui ‘lơ̆ng rŏ truh tơ thoi noh”.

Apĭnh đĭ đăng krao khan hơdai: Kơkuh kơ Kră Yang ‘mêm kơ eng, kon bơnê kơ Ih yua kơ nơ̆r pơkă tơdrong arih ling lang oei lăm Ih. Apinh Ih tơgŭm kon wei kơjăp nơ̆r Ih wă kơ arih pơm kơdranh kơ Ih, mă lăm tơdrong truh anat anot dêh. Apinh tơgŭm kon ling lang ‘blŏk kơ pơlei pơla tơpă kon noh tơ kơpal plĕnh ti, anih Ih ‘măn lê̆ kơ kon minh anih ‘lơ̆ng rŏ. Kon arih hăm tơdrong chang hơmĕng noh đơ̆ng năr ‘nâu truh tơ kon tơ’bơ̆p Ih. Kon krao khan hăm anăn Yang Yêsu Krist, A-men

Ơ lu bơngai mơ̆ng mă ‘mêm kơ eng, bơ̆n oei arih tơ anih tơmoi, mălei bơ̆n oei kơnhăm pơjing lơ tơdrong ‘mônh kơ hiong răm, na hiơt lê̆ kơ pơlei pơla bơ̆n tơpă tơ kơpal plĕnh ti. Tơdrong chang hơmĕng tơ anih plei ‘lơ̆ng ưh kơ sĭ ăn kơ lu bơngai wă jê̆ lôch, noh jơ̆ nơ̆r hơdơ̆r ăn kơ lu bơ̆n – oei arih tơ kơpal teh đak ‘nâu: athei arih thoi minh nơ̆r pơm kơdranh rơđah gah tơdrong lui tơ anih đei tơdrong arih ling lang. Kơplah bơ̆n wei kơjăp nơ̆r pơkă Yang Yêsu, tơdrong lôch ưh pă thoi hơlŭng jrŭ nhơ̆m hmoi, mă gô jing thoi anih pơkă đei pŭn hiôk- kơplah lu bơ̆n oei hơdai hăm ‘Bă tơ lăm Hnam Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.