Ih jơ̆ bơngai ling lang proh hơmet lê̆ tôm tơdrong đơ̆ng hrôih, dah đei gô truh tơ jơ wă jê̆ na hăt hot kơdâu pơjei hăm jơ ‘năr? Ưh kơ tam tŏk tơ gre păr, hiơ̆ kơ năm tơ’bơ̆p kiơ̆ kơ đei pơkă lei oei đei trong wă hơmet. Mă lei đei mĭnh jơ năr na dah pơ hiơ̆ gô đei ba ăn tơdrong hmach ling lang: ‘noh jơ̆ kơplah ‘Bok Dŏng Pơklaih Yang Yêsu jur dơ̆ng. Lei ŭnh kơđeng bơhngol ih hăm đei ling lang hơdah dah wă păt yua kơ đak dâu đĭ?

Năr ‘nâu, ‘năr 16/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Marissa Nordlum kơ̆l ‘bai BUĂL TAM ĐEI KƠCHĂNG ƯH?

“Yêsu pơtih gia tơdrong noh đang boih na Sư khan: “Iĕm athei kơchăng mă tơpă, yua kơ iĕm ưh kơ băt năr ayơ, jơ ayơ Inh wă jur tơ iĕm.” (Mathiơ 25:13)

“Oh tam kơchăng ưh?”- Nơ̆r đơ̆ng klo inh re jơwa rơngơp, lăp pă dôm jơ bơih jơ̆ gre gô păr. Lu nhôn đei proh hơmet kơ tơdrong yak năm đunh 20 năr, thoi noh na kơplah jơ ‘brưch pơge hrôih inh oei hăt hot kơ hơmet tơmam. Inh đei gleh lap mă khan trong yak năm oei tim mă pơtơm.

Hăm đei bu lăm lu iĕm kŭm ngăl đei pơ hiơ̆ lei lăi thoi inh ưh? Lăp ‘nao chih dôm kơ trong ‘nâu đĕch na đei bơuh bơang hloi. Tơpă, nơ̆r jet “tam kơchăng ưh” nhen thoi đei druh kiơ̆ inh đĭ chăl arih. Inh jơ̆ bơngai ngăl juăt kơ gô “đak truh ‘bơ̆t jơ̆ng ‘mơ̆i na pơplŏng”. Mă đon tơchĕng băt khan hơmet lê̆ adrol ling lang ‘lơ̆ng hloh, mă lei ưh kơ hlôh thoi yơ, inh nŏng kơ ling lang ăn tôm tơdrong dĭng truh ‘bơ̆t jơ tuch luch.

Brei mơsơ̆ ‘nâu, Kră Yang đei bơtho kơ inh gah tơdrong gĭt đơ̆ng tơdrong hơmet lê̆, păng tơdrong ‘noh oei tơplih tơpă đĭ tơdrong arih inh. Adrol kơ ‘nâu dôm khei, kơplah oei hơ oei lăm hnam akŭm (trŏ tơpă jơ̆ inh năm klui), ‘bok bơtho pơtơm bơtho lăm chăl Sơ̆p Hla Bơar Nơ̆r ‘Bok Kei-Dei lăm Mathiơ 25: “Kơplah năr ei kơnh lu bơngai mă khan ‘Bok Kei-Dei pơgơ̆r lu sư ră, mă-lei lu sư thoi lĕ kơ mơjĭt ‘nu adruh âu, rim ‘nu kơ lu sư chĕp ŭnh kơđeng ngăl wă năm ngôi hơpong kơ bơngai ‘nao iŏk akăn…” (Mathiơ 25:1)

Kơplah dôm kơ nơ̆r lăm Mathiơ 25:1-13 đei re, đei mơn chhưu lăm jơhngơ̆m inh. Hơ’mon roi gah mơjĭt ‘nu adruh năm ngôi hơpong kơ bơngai ‘nao iŏk akăn. Sơ̆p Hla Bơar Nơ̆r ‘Bok Kei-Dei krao pơđăm ‘nu adruh jơ̆ “đei kơchăng” păng pơđăm ‘nu adruh jơ̆ “ưh kơchăng”, lăng đơ̆ng lăm tơdrong hơmet lê̆ adrol đơ̆ng lu sư (Mathiơ 25:2-3) Lăm kơplah chang gô, đĭ đăng lu sư đei tep hiơt hloi. Kơplah nơ̆r jreo ôr tơbăt bơngai ‘nao iŏk akăn ei truh, pơđăm ‘nu adruh mă ưh kơchăng noh đei hiơ̆k tơtăm ‘bôh băt ŭnh kơđeng sư wă păt yua kơ đak dâu trôl ưh kơ mah. Lu sư ưh kơ đei hơmet lê̆ tôm đak dâu trôl kơ trong yak năm đunh. Hơlơ̆k dơ̆ng, pơđăm ‘nu adruh kơchăng đei hơmet lê̆ bơih đak dâu trôl lăm bŏl, na lu sư noh mơ̆t kiơ̆ hloi tơ hnam đe pơkong sŏng sa hơdai hăm bơngai ‘nao iŏk akăn (Mathiơ 25:10).

Lăm kơplah jơ ‘noh, inh băt Kră Yang oei dơdŭ ‘măng lăm jơhngơ̆m inh. Ih hăm đei layơ mơn ‘bôh thoi noh ưh? Inh mơ̆ng kơtơ̆ng nơ̆r Sư tơ ‘blŏk jơhngơ̆m: athei gĭt lăm tơdrong hơmet adrol. Ưh kơ sĭ jơ̆ dôm tơdrong jang juăt hmă, na kŭm jơ̆ hơmet kơ bơhngol kơdih. Inh hăm đei kơchăng tơpă kơ năr ‘Bok Dŏng Pơklaih Yang Yêsu jur dơ̆ng ưh? Inh oei arih lăm jơhngơ̆m krăng kơchăng, chang gô, dah oei jroh hoch lăm teh đak na ưh kơ đei tơdrong proh hơmet ayơ?

Yang Yêsu gô jur dơ̆ng tơpă. Mă ưh kơ đei bu băt năr dah jơ, mă lei rim năr đei hlôi, jơ năr ‘noh rai jê̆ hloh. Ih hăm đei arih lăm hơdah đơ̆ng chăl đơ̆ng rŏng ưh? Ih hăm đei bơwei kơ ŭnh kơđeng kơdih ling lang khơ̆ng?

Dah năr ‘nâu, ih ‘bôh kơdih lei lăi thoi minh lăm pơđăm ‘nu adruh ưh kơchăng- đak dâu trôl ưh kơmah păng ưh kơ đei hơmet lê̆? Tơdrong hli yom ‘lơ̆ng rơgoh gom klơ̆p inh kơplah tơ’bơ̆p hăm nơ̆r jet ‘noh. Inh wă kơ đei roi khan jơ̆ bơngai kơchăng dah Sư blư truh. Inh tam đei sơng iŏk tơdrong dŏng pơklaih ưh? Đei tơpă. Mă lei inh hăm đei tôm đak dâu trôl kơ trong yak năm đon lui, kơ dôm khei sơnăm chang gô đunh ‘nâu ưh? ‘Noh jơ̆ nơ̆r jet mă rim ‘nu Bơngai Lui đei kăl kơ jet kơdih.

“Đak dâu trôl bơhngol” trŏ jơ̆ jơ ih tơchĕng pơwao Nơ̆r Kră Yang. ‘Noh jơ̆ dôm kơ jơ phŭt pơgơ̆p hăm Sư lăm tơdrong krao khan. ‘Noh Kŭm jơ̆ tu jơhngơ̆m pran bơwei tơdrong arih đei đon lui đơ̆ng ih huay kơ păt ‘bơ̆t anăp ‘mui kial teh đak. Hơpơi tơdrong arih lu bơ̆n đei tuh pơgang ‘bâu phu đơ̆ng Yang Bơhngol ‘Lơ̆ng, tơ̆k hơdah ŭnh rơgoh, khơ̆ng hơnơ̆ng ưh kơ pơdơh, wă chông anhăk bơngai nai năm tơ ‘Bok Dŏng Pơklaih Yang Yêsu. Wă kơplah Sư jur dơ̆ng, ưh kơ sĭ lăp akâu jăn lu bơ̆n kơchăng, na kŭm tơgŭm lơ bơngai nai kŭm gơh krăng kơchăng thoi noh.

Apĭnh đĭ đăng krao khan hơdai: Kơkuh kơ ‘Bok Dŏng Pơklaih Yang Yêsu mă ‘mêm, kon rơhing gơh kơchăng kơ năr Ih jur dơ̆ng. Kon wă kơ chăl arih kon gơh đei tơplih rơgoh păng tuh tơ’bĕnh đak dâu trôl ‘nao rim năr. Apinh bơwei kon ling lang jê̆ hăm Nơ̆r Ih păng kơjăp lăm tơdrong krao khan. Apinh tơgŭm kon bơwei kơjăp ŭnh bơhngol khơ̆ng dĭng truh kơplah kon gơh tơ’bơ̆p Ih.
Kon krao khan hăm anăn Yang Yêsu Krist, A-men

Ơ lu bơngai mơ̆ng mă ‘mêm kơ eng, ih oei chĕp lăm tơpang ti ŭnh kơđeng rang hơdah, dah lăp jơ̆ mĭnh pôm kơđeng đĭ đăk dâu trôl? Athei jơ̆ dôm lu bơngai krăng kơchăng băt hơmet lê̆ wă chang gô Kră Yang jur dơ̆ng. Tơdrong hơmet lê̆ ‘noh ưh kơ trŏ jơ̆ dôm tơdrong kiơ tih, kơjung hloh, mă lei pơtơm hloi đơ̆ng kơdih tơdrong pơgơ̆p kơdih kâu hăm Kră Yang rim năr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.