Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Peb nyuam qhuav hla dhau tej hnub hli uas txomnyem thiab sim siab kawg li. Ntau zaug peb cim civ nug tias Vajtswv nyob qhov twg thaum uas tej teeb meem ntawd yim hnub yim phem zuj zus thiab lub neej yim hnub yim txomnyem tuaj! Zaj kawm hnub no rov qab ntuas kom koj nco tias Vajtswv yog leej twg thiab lub sijhawm tamsim kuj yog ib feem nyob rau hauv lub homphiaj uas twb tau Vajtswv npaj ua ntej lawm. 

Hnub no, yog hnub 02/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Natalie Ragland dhau ntawm zaj kawm MUAJ RAWS LI LEEJ TXIV LUB SIAB NYIAM

Vajtswv twb xaiv peb cov uas nrog Yexus Khetos koom ib txojsia los ua Vajtswv haivneeg raws li Vajtswv twb xub xav tseg thaum tsis tau tsim lub ntuj thiab lub ntiajteb los lawm. Vajtswv ua li ntawd, rau qhov Vajtswv yeej ua ib puas tsav yam raws li Vajtswv pom zoo thiab raws li Vajtswv twb xub xav tseg lawm. (Efexus 1:11)

Nyob rau kuv lub sijhawm thov Vajtswv hli dhau los, Vajtswv tshoov kuv lub siab kom xav txog zaj lus thov uas Tswv Yexus tau qhia nyob rau hauv Mathais 6:9-13. Txawm yog ntawm no yog zaj lus thov uas peb pheej hais tias yog zaj lus tuam txhij thov, thiab kuv twb nyeem mus nyeem los ntau zaug, tiamsis thaum no kuv hnov tseem ceeb kawg nkaus thaum nyeem nqe “ koj lub siab nyiam” plaub nqe no txhawb kuv sab ntsujplig, ua rau kuv tus ntsujplig tau nyob twj ywm thiab tab pov rau kuv tias leej twg thiaj yog tus tab tom muaj cai tswj. Thaum uas kuv khuab xeeb txog tej uas tab tom tshwm sim nyob rau hauv lub ntiajteb niaj hnub nim no, ib lub sijhawm muaj kev tsis ywj pheej, sib faib ua pab pawg, txhua yam tsis tab pov, Vajtswv tau ntuas kuv  tias leej twg tab tom zaum saum lub rooj tswj hwm thiab leej twg thiaj yog tus tswj txhua yam, thiab yog tus pom txhua yam thiab yam ntsia tsis pom tib si: tus ntawd yog Vajtswv ntag. 

Kuv pom tias kuv tau pib cia sab nqaij tawv txoj kev ntshaw tshwm tuaj, ua rau kuv tus kheej tsom ntsoov rau lub ntiajteb no pauv rau qhov uas tsom ntsoov rau tej uas Vajtswv hais nyob hauv Nws txojlus. Kuv yuav vam khom tsis tau rau kuv txoj kev totaub vim kuv tus kheej txoj kev ntsia muaj nrim ntsia tsis pom ntau yam nyob hauv lub neej. Yam uas kuv cheem tsum yog ntseeg rau tus uas tab tom ua vajntxwv tswj txhua lub tebchaws. Ntawd txawm tsis yog tej uas ib tug ntseeg Yexus Khetos tseeb ntseeg rau lov? Ntseeg siab rau Vajtswv txawm yog txhua yam ib ncig ntawm peb cuag li tsis zoo li peb siab xav. 

Thiab kuv kuj lees yuav tej ntawd, xyoo no yog ib lub xyoo puv npo txhua yam teeb meem tshwm sim tuaj tsis raws li yus lub siab xav.  Tiamsis thaum ntsia rau Vajtswv thiab tsom ntsoov rau tej uas Nws hais, peb paub tias txhua yam, tsis yog qee yam tiamsis yog “txhua yam” tau ua tiav “raws li Vajtswv lub homphiaj uas Nws xav”. 

“Vajtswv twb xaiv peb cov uas nrog Yexus Khetos koom ib txojsia los ua Vajtswv haivneeg raws li Vajtswv twb xub xav tseg thaum tsis tau tsim lub ntuj thiab lub ntiajteb los lawm. Vajtswv ua li ntawd, rau qhov Vajtswv yeej ua ib puas tsav yam raws li Vajtswv pom zoo thiab raws li Vajtswv twb xub xav tseg lawm.” (Efexaus 1:11). 

“Tus TSWV yog vajntxwv, Nws kav txhua haiv neeg” (Ntawv Nkauj 22:28). 

Thaum kuv nyeem mus nyeem los ob nqe no thiab siv sijhawm nrog tus Tswv nyob ua ke, kuv nkag siab zoo thiab txais yuav tias kuv yeej tswj tsis tau ib puas tsav yam. Kuv kuj tau ntuas tias Vajtswv twb npaj ua ntej txhua yam lawm. Paub tias, txawm yog peb tsis nkag siab txog txhua yam tab tom tshwm sim tiamsis puag thaum chiv keeb Vajtswv twb paub txoj kev kawg ntawm txhua yam. Nws yog Alafas thiab Aumenkas. Qhov no ceeb toom kom kuv yuav tau mus cuag Vajtswv thiab taij thov Nws zam txim vim nyob rau lub sijhawm dhau los, kuv tau siv zog  kom yus lub siab tswj txhua yam pauv qhov uas mus raws li Vaj Ntsujplig ua tus coj kev. 

Ua neej nyob rau lub caijnyoog muaj ntau yam kev sim siab li niaj hnub nimno, ntseeg tias peb txhua tus yuav tsis hnov qab tus uas peb tab tom ua haujlwm rau. Nws twb npaj txhij kom yam twg tshwm sim nyob rau lub sijhawm no. Tej zaug peb tsis nkag siab thiab tsis thooj yim rau tej uas Vajtswv tau txiav txim, tiamsis Vajtswv paub tias yam twg yog yam uas zoo tshaj plaws. Yog tias peb hnov tsis muaj kev kaj siab, cia li cim civ nug yus tus kheej seb peb puas tab tom cia lub ntiajteb no tswj peb tej lus hais, peb txoj kev xav thiab peb tej haujlwm txog Vajtswv ntuj. – tus uas ntsia pom txhua yam peb tau ua thiab yog tus tswj txhua haiv neeg!

 Thov caw nrog kuv peb thov Vajtswv ua ke: Tus Tswv, txawm yog peb tsis nkag siab txog txhua yam uas tab tom tshwm sim ib ncig ntawm peb, tiamsis thov pab kom kuv tso siab plhuav rau ntawm Koj, yog tus pib thiab tus xaus, tus uas tswj txhua haiv neeg. Thov kom peb ua raws li Vajtswv lub siab nyiam. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug nyob rau lub sijhawm dhau los koj hnov txhawj, siv zog nrhiav seb vim li cas yam no yam tod tau tshwm sim los raug rau kuv. Zaj kawm hnub no xav txhawb koj lub zog tias txawm yog yuav nkag siab thiab tsis nkag siab los kuj yuav tau ntseeg rau Vajtswv vim Nws lub homphiaj yog zoo tshaj plaws. Cia li los cuag Vajtswv dhau tej lus thov “Thov kom peb ua raws li Koj lub siab nyiam.”

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.