Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Bol he pa lòt gan ală ngai kơnhai oă ngan bơta gơlòng, mơ bòl glar. Dơ̆ dơ̆ bol he lùp is lah ntềng đah Yàng ơm tòm tŭ bơta gơlik gơs sơlo ngai sơlo iơh, mơ rài kis sơlo ngai sơlo kal ke rlau. Bơta bơtê ngai do rơp tơngkah wơl bol he in kah lah Yàng là ñcau mơ pah tơngai tŭ do kung la dô pơnah tòm bơta rơndap tap sèng neh lơh nền lài Yàng dê.

Ngai do, ngai 02/11/2021. Bơta Hòi Dan Kòp Ngai dan jà ồng mò oh mi bơtê bal jơnau Yàng dê kơnòm dê bơta dong kòl mò  Natalie Ragland dê bơh tơnggume NÙS KÒÑ BÈP GƠS DI

Hơ̆ la tòm Bơtau Krist mơ bol he neh dòp geh sre brê, jat be bơta lơh nền lài Yàng Tom Trồ dê, la Bơtau rgơi lơh wil tơl jơh ală bơta jat nùs kòñ Kơnràñ dê. (Êphêsô 1:11)

Tòm tŭ jơ hòi dan àng drim añ jê tòm kơnhai lài, Yàng chồl bơtrut tòm nùs añ nàng kơlôi bơh jơnau hòi dan Yàng Jesu dê geh cih tòm sră Mathiơ 6:9-13. Bulah do la jơnau hòi dan òs mòng mơ bol he sùm sơnđan la bơta hòi dan bal, mơ añ neh sền wêh sền wơl oă dơ̆, mơya dơ̆ do añ sền gŏ gơlơh krơi is ngan tòm tŭ sền sèng  “nùs kòñ Bèp gơs di”. Poan jơnau do chồl bơtrut hwềng soàn añ, lơh hwềng nùs añ geh ring ngềt mơ ho nền mơ añ lah cau lơi la cau gơs gơnoar at bồ rlau jơh. Tòm tŭ añ gơs oă sèng lùp bơh ală bơta gơlik gơs tòm dunnia do ngai do, dô pah tơngai sơlồng sơlàng, dơrcùl, tòm cah is, ò kơ̆ wền, Yàng Tòm Trồ neh tơngkah añ ñcau ơm nggùi hơđang sơban at bồ mơ ñcau la cau sền sơwì jơh ală bơta, ală bơta sền gŏ mơ mat bal mơ lă bơta ò rgơi sền gŏ mơ mat: hơ̆ là Yàng.

Añ đal git añ neh sơntòm lòi đah poac să in gơs gơnoar, lơh să tòm in ơn nùs tồr dê dunnia do rlau mơ ơn nùs tồr tòm bơta Yàng đơs tòm Sră Goh. Añ ò rgơi dòn kơnòm tòm bơta git wă añ jê taibơh să tòm gơkòl kơryan bơh oă pơnah pha is rài kis dê. Bơta añ pal càng la dòn kơnòm dê Bơtau at bồ jơh dunnia. Hơ̆ ò di là ală bơta mơ dô nă cau bơtê ngan Bơtau Krist dê neh dòn ơ? Dòn kơnòm Yàng bulah ală bơta gùtdar bol he gơlơh be ò jat nùs kòñ he dê.

Mơ añ kung dòp bơta hơ̆, nam do la dô nam bềng ală bơta gơlik gơs ò jat nùs kòñ he dê. Mơya tòm tŭ sền tơnggòr dê Yàng Tom Trồ mơ ơn nùs tồr tòm ală bơta Kơnràñ neh đơs, bol he git lah jơh ală bơta, ò di là dô êt, mơla “jơh ală bơta” geh lơh sir “jat tơnggume broă Yàng kòñ”.

“Hơ̆ la tòm Bơtau Krist mơ bol he neh dòp geh sre brê, jat be bơta lơh nền lài Yàng Tom Trồ dê, la Bơtau rgơi lơh wil tơl jơh ală bơta jat nùs kòñ Kơnràñ dê.” (Êphêsô 1:11) 

“Bơh gơnoar at bồ gơrê bal mơ Yàng Jehôwa, Kơnràñ at bồ hơđang ală làng bol.”  (Đơs crih  22:28)

Tòm tŭ sền wêh sền wơl bàr sèng do mơ ơn tŭ tơngai ơm is mơ Yàng, nùs nhơm añ wă loh mơ dòp git lah añ ò rgơi sền sơwì ală bơta. Añ kung geh bơta tơngkah wơl lah Yàng neh lơh nền lài ală bơta rau. Ngan gơ dê la, bulah bol he ò wă ală bơta gơlik gơs mơya bơh sơnròp bồ dà Yàng neh git bơta lồidut jơh ală phan dê. Kơnràñ la Alpha mơ Ômega. Bơta đal git do tơngkah añ pal tus mơ Yàng mơ hòi dan Kơnràñ toh glài tàibơh tòm ală ngai kơnhai neh rlau, añ neh pơnđơl pràn nàng lòi bơta kơlôi sơnơng añ jê sền sơwì ală bơta mơ ò lòt jat bơta tề lam Yàng Hwềng Goh dê.

Kis tòm ală pah tơngai bềng bơta gơlòng bol glar be tŭ do, kơpkờñ lah kòp nă tòm bol he rơp ò hŭi Bơtau mơ he duh broă. Yàng neh lơh nền lài ală bơta gơlik gơs tòm tŭ do. Digơlan bol he ò wă jơh mơ kung ò dô nùs bal mơ ală bơta lơh nền Yàng dê, mơya Yàng git bơta lơi là niam rlau jơh. Dilah bol he gơlơh be roh bơta ring lơngai, pal lùp is să tòm lah bol he gam lòi  dunnia do in at bồ jơnau đơs, bơta kơlôi sơnơng mơ broă lơh he dê bơh Bèp Hơđang Jòng - Bơtau sền gŏ ală broă lơh he dê mơ la Bơtau at bồ jơh ală lơgar hala ò?

Dan jà bol he dô nùs bal tòm bơta hòi dan: Khoai Yàng, bulah kòn ò rgơi git wă ală bơta gơlik gơs gùtdar, mơya dan dong kòn sùm dòn kơnòm dê Yàng, la Bơtau sơnròp mơ lồi dut, bơtau at bồ hơđang jơh ală lơgar. Dan nùs kòñ Bèp gơs di ngan tòm rài kis kòn. Kòn ai sơnđan Yàng Jesu Kris, hòi dan mơ Yàng Bèp. Amen.

Ơ ală ồng mò oh mi kòñ gơboh, digơlan tòm tŭ tơngai neh rlau bol he gơs oă bơta kơlôi rcang, dơrcul, pơnđơl pràn jòi git ñchi bơh tai bơta do, bơta ne gơlik gơs mơ he. Bơta bơtê ngai do kòñ pơndòm pơniang bol he lah bulah bol he git wă hala ò gen kung dòn kơnòm tĕ dê Yàng bơh bơta rơndap Yàng dê la niam rlau jơh, Tus tĕ mơ Yàng tòm bơta dòn bơr gan dê jơnau hòi dan “ dan nùs kòñ Bèp gơs di.”

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.